Menawi dereng tepang kaliyan piyambakipun, tiyang kakung ingkang asalipun saking kutha Sragen menika katingal kalem saha pasif piyantunipun. Ananging manawi sampun tepang kaliyan tiyang ingkang anggadhahi asma jangkep Juang Jatmiko (23 taun), mesthi bakal boten nyana menawi piyambakipun menika salah satunggaling tiyang ingkang aktif ndherek kegyatan.
Menapa malih kegyatan ingkang gayutanipun kaliyan budaya Jawi. Tiyang ingkang wulan agustus tanggal kaping 31 kala wingi, nembe mawon dipunwisuda dados sarjana Pendidikan Bahasa Jawa wonten ing Universitas Negeri Yogyakarta. Dados Mas Juang menika ugi boten tebih kaliyan kegyatan ingkang gayutanipun kaliyan budaya Jawi.

Tiyang ingkang miyos wonten ing Sragen tanggal 15 Oktober 1990 menika remen sanget kaliyan bab Teater tradisional mliginipun kethoprak. Jalaran rumiyin pancen piyambakipun nalika taksih wonten ing bangku kuliah ugi aktif wonten ing organisasi Himpunan Mahasiswa wonten ing jurusanipun menika. Himpunan Mahasiswa Pendidikan Bahasa Daerah utawi sampun kawentar Hima Jawa wonten ing UNY dados papan ingkang ngrembakakaken minatipun Mas Juang menika. Amargi dados tokoh sentral wonten ing organisasi menika inggih dados pangarsa wonten ing taun 2011, Mas Juang mesthinipun ugi kersa boten kersa kedah ngurusi kegyatan wonten organisasi menika. Salah satunggaling menika wonten Sanggar kethoprak ingkang dados program kerjanipun saking divisi wonten ing Hima Jawa menika. Lantaran menika minatipun Mas Juang anggenipun nyinaoni bab teater tradisional menika saya ageng. Kathah teater ingkang sampun dipunlakoni dhateng Mas Juang. Tuladhanipun teater tradisional ingkang sampun dipundhereki Mas Juang menika antawisipun Pasir Menari taun, Dhedhes Prameswari Pradnya Paramita, lajeng kalawingi ingkang pungkasan sabtu 15 desember pentas teater wonten ing Akademi Teknik Kulit Bantul Yogyakarta kanthi irah-irahan Joko Kembang Kuning. Samenika Mas Juang Jatmiko taksih aktif ndherek kegyatan teater Rinengga wonten ing kutha Yogyakarta. Pesenipun Mas Juang kangge mudha mudhi adhik angkatanipun wonten ing Jurusan Pendidikan Bahasa daerah menika namung sampun ngantos budaya Jawa menika kalah kaliyan Budaya modern, kita modern ananging budayanipun tetep kedah budaya ingkang dados pandoming tiyang Jawa awit jaman rumiyin sampun dipunjagi.