Ines Ika's blog: Opini Pendek : Ningali Proses Damel Tenun Lurik Wonten ing Padukuhan Kembangan 10

Des

Opini Pendek : Ningali Proses Damel Tenun Lurik Wonten ing Padukuhan Kembangan 10

Ines

Kerajinan tenun kagunganipun Pak Edi ngajeg wonten ing 9 Oktober 2010 ancasipun kangge ningkataken ekonomo masarakat. Piranthi tenun ingkang dipunginakaken wonten ing dalemipun Pak Edi minangka bantuan saking Badan Pasca Gempa. Pabrik Kerajinan menika papanipun wonten ing Padukuhan Kembangan 10, Sumber Rahayu, Moyudan, Sleman,Yogyakarta.

- Proses penenunan:

Pewarnaan

Lawe ingkang dereng dipun paringi warni

Lawe ingkang sampun diputumbas wonten ing pabrik, warninipun taksih pethak dados kedah dipunparingi warni supados ngasilaken motif lurik ingkang maneka warni.

Proses pewarnaan wonten 2, inggih menika :

Pewarna alami

a. Pewarnaan alami. Ngginakaken kajeng nangka, kajeng pelem, akar-akaran, kajeng mengkudu, ron rambutan (ngasilaken warni abu-abu), jambal, jolawe (ngasilaken warni coklat nem), kajeng jati (ngasilaken warni abrit nem), tingik (ngasilaken warni coklat). saderengipun proses pewarnaan, pewarna alami menika dipungodhog rumiyin. Proses menika betahaken wekdal ingkang lami supados ngasilaken warni ingkang sae.

Pewarna buatan

b. Pewarnaan buatan. Ngginakaken pewarni indrantin inggih menika campuran saking direct kaliyan hidro. Saderengipun proses maringi warni, pewarni menika dicampur rumiyin kaliyan toya panas lajeng dicampur kaliyan toya asrep kathahipun 300 ml. Proses pewarnaan satunggal gulung lawe betahaken 20 gram supados ngasilaken warni nem kaliyan satunggal gulung lawe, betahaken 30 gram kangge ngasilaken warni tua.

Penjemuran

Menawi ngginakaken pewarna alami proses menika betahaken kanthi sawetara dinten, ananging bilih ngagem pewarna buatan namung betahaken wekdal satunggal dinten.